Que as túas contas sigan sendo túas
Seis pasos para as túas contas, empezando polo correo e seguindo con WhatsApp, Instagram e TikTok: contrasinais distintos, un xestor que os lembre e a verificación en dous pasos. E que facer se xa che roubaron unha.
-
Un contrasinal longo e distinto para cada conta
Se unha web perde o teu contrasinal, cun distinto en cada sitio o resto das túas contas segue protexido.
- Empeza polo correo: quen entra no teu correo pode recuperar todas as demais contas.
- Crea contrasinais longos co xerador e non repitas ningún.
- Revisa se algunha xa circula en filtracións e cámbiaa.
-
Gárdaos nun xestor de contrasinais
Un xestor lembra todos os teus contrasinais por ti e non os enche nunha web cun enderezo distinto. Se non che ofrece o contrasinal, sospeita da web.
- Usa o xestor que xa trae o teu móbil ou o teu navegador, ou o que prefiras.
- Protéxeo cun contrasinal mestre longo que non uses en ningún outro sitio, e activa a súa verificación en dous pasos.
- Cando xa as teñas gardadas, exporta o arquivo e revísaas todas con «Saúde dos teus contrasinais». Despois, borra o arquivo e baleira a papeleira: garda os teus contrasinais sen cifrar.
-
Pon ao día o correo e o teléfono de recuperación
Son a chave para volver entrar se perdes o acceso. Se están anticuados, recuperar a conta é moito máis difícil.
- En cada conta, revisa que o correo e o teléfono de recuperación son os teus e seguen activos.
- Nunca lle des a ninguén un código que che chegue por SMS ou por WhatsApp, nin por mensaxe nin por chamada, aínda que che digan que cho enviaron por erro.
- Se ao activar a verificación en dous pasos a app che ofrece códigos de recuperación, gárdaos no teu xestor ou en papel: devólvenche a conta se perdes o móbil.
-
WhatsApp: verificación en dous pasos
Quen consiga o código do SMS necesitará tamén o teu PIN de seis díxitos para activar o teu WhatsApp noutro móbil.
- Abre Axustes > «Conta» > «Verificación en dous pasos» e preme «Activar».
- Escolle un PIN de seis díxitos que non sexa a túa data de nacemento e engade un correo para recuperalo.
-
Instagram: autenticación en dous pasos
Ademais do contrasinal, pedirá un código a quen intente entrar desde un dispositivo novo.
- Vai ao teu perfil, preme as tres raias e entra en «Configuración y actividad» > «Centro de cuentas».
- Escolle «Contrasinal e seguridade» > «Autenticación en dous pasos» e segue os pasos.
- No iPhone, revisa tamén «Onde iniciaches sesión» e pecha as sesións de dispositivos que non recoñezas; en Android, as alertas de inicio de sesión chéganche por correo.
-
TikTok: verificación en dous pasos
Pon un segundo paso a quen tente entrar na túa conta co teu contrasinal.
- Vai ao teu perfil, preme as tres raias e entra en «Ajustes y privacidad» > «Seguridad y permisos».
- Abre «Verificación de seguridade», engade o teu teléfono e o teu correo e activa a verificación en dous pasos.
- Comproba que todas as opcións teñen o tic verde.
Os nomes dos menús poden cambiar un pouco con cada versión das apps. Datos comprobados nas guías de INCIBE o 9 de outubro de 2026. O que marcas como feito queda neste dispositivo.
Se che roubaron unha conta
- Se aínda podes entrar, cambia o contrasinal, pecha as sesións noutros dispositivos, revisa que o correo e o teléfono de recuperación seguen sendo os teus e activa a verificación en dous pasos.
- Se xa non podes entrar, usa a recuperación oficial da rede (ligazóns embaixo) e dá todos os detalles que poidas. Desde a conta dun amigo tamén podes denunciar o perfil roubado.
- Avisa os teus contactos por outro medio: desde unha conta roubada adoitan pedirse diñeiro ou códigos aos amigos.
- Se che piden diñeiro por devolvértela, non pagues. Chama ao 017 (WhatsApp 900 116 117, Telegram @INCIBE017), de 8:00 a 23:00.
Avisas os teus contactos? Prepara a mensaxe aquí, para a túa familia ou para os teus clientes.
Ligazóns oficiais para recuperar ou denunciar cada conta
- Instagram (ábrese noutra lapela)
- Facebook (ábrese noutra lapela)
- X (ábrese noutra lapela)
- TikTok (denunciar suplantación; para entrar, usa «¿Has olvidado tu contraseña?» na app) (ábrese noutra lapela)
- LinkedIn (ábrese noutra lapela)
Chamar ao 017 Botón de emerxencia
Ligazóns publicadas por INCIBE na súa guía de roubo de contas (ábrese noutra lapela).
Preguntas frecuentes
Canto custa?
Nada: a guía é gratuíta, e a verificación en dous pasos das redes tamén.
Que é a verificación en dous pasos?
Unha segunda comprobación ademais do contrasinal: un código ou un PIN. Aínda que alguén saiba o teu contrasinal, sen ese segundo paso téno moito máis difícil para entrar.
Escribíronme dicindo que me enviaron un código por erro. Reenvíoo?
Non. É un engano habitual para roubar contas de WhatsApp: ese código serve para activar a túa conta noutro móbil. Non o compartas con ninguén.
Chégame algo do que marco?
Non. A lista do que fixeches gárdase só no teu dispositivo.
Chegouche unha mensaxe que pide un código ou o teu contrasinal? Compróbao antes de responder.
Queres deixar listo como recuperar as túas contas se un día as perdes? Mira Antes de que pase.